Mizo Elite News hi ṭha i tihzawng a nih chuan min lo Follow dawn nia

TBC Zaithanpuia Fapa Hming Ah TBC Justa Zaimuana Tiin Sa, A Hming Lo Pian Chhuah Dan

‘Justa’ tih hming hi TBC Justa Zaimuana pian hma kum 8 kal taah khan a pu TBC Lalramkima chuan a fapa TBC Zaithanpuia hnenah, “Fapa i neih chuan a hming atan ‘Justa’ tih i sa dawn nia,” tiin a lo sawi lâwk diam tawh a, hei hi Pathian hnen aṭanga a dawn lâwk daih tawh a ni. Hei hian Justa-a pu TBC Lalramkima (Pa Rama) hian Pathian thu a chikzia leh Bible a zir ngunzia a tar lang chiang hle bawk a ni. Tichuan, TBC Zaithanpui leh Elvina Lalmuanpuii te’n Pathian khawngaihna azarah October ni 12, 2020 dar 9:30 a.m. khan Ebenezer Medical Center-ah fapa duhawm tak an nei ta a, a hmingah TBC Justa Zaimuana an phuah ta a ni.

‘Justa’ tih chu a puin Kum 2012 daih tawha a lo phuah lâwksak tawh angin a hming bulah Justa an dah ta a; Zaimuana tih lai tak erawh hi chu an nupa hming phel la kawpa TBC Zaithanpuia phuah a ni.

“JUSTA” tih hi ṭawng dang emawin a awmzia lam hi luhchilhin kan chhui dâwn lo. A phêna Pathian thu ril leh thûk tak inphûm zâwk hi kan tar lan tum a ni.

Bible aṭanga bih chianna: TIRHKOHTE THILTIH 1:20 – 26-ah chuan zirtir sawm leh pakhat zinga tel tur mi pahnih an thlan chhuah (nominate) zinga pakhat zâwk hming a ni tih kan hmu a. Chu chu Josefa Barsaba (a hming dang Justa an ti bawk a); tin, pakhat dang chu Matthia a ni.

Zirtir sawm leh pakhat te zinga Juda aiawh tur an thlanna ah hian teh fung (qualification) pawimawh tak pahnih chiah an siam a. Chu chu Isua Johana’n baptisma a chantir lai, a tir tê aṭanga an
zinga tel ve a ni tur a ni a, Isua thawhlehna hriatpuia vana hruai chhohva a awm ni thlenga tel ve a ni bawk tur a ni. He mite pahnih hi zuitu rinawm tak an ni ve ve a.

Chanchin Tha bu li – Mathaia, Marka, Luka leh Johana ziakah hian an hming a lang ve hauh lo. Nimahsela, an zingah erawh nghet tak leh rinawm takin an tel ve ngat ngat a. An hming reng reng a lan ve loh dan aṭang hian thil chiang tak lo lang nghâl chu hei hi a ni: Ringtu tam takin kan buaipui rûk fo—lei lama ropuina emaw, hmingṭhatna emaw leh hming lanna tur dinhmun lam an buaipui ngai lo va. Lal Isua an rinna chu vawng tlatin, inngaitlawm tak leh rinawm takin Lal Isua an zui zêl a ni.

An hming lan vena tur emaw, dinhmun sâng emaw buaipui ve lo mah se, Pathian zâwkin a hriatpui reng a, Pathian hun ruat chu an tan a lo inher chhuak ta a. Chatuana dai leh ngai tawh lo tura chawi sâna awmin, zirtir sawm leh pakhat te zinga tel tur nominee zingah an lo lang ta a ni. Tichuan, Matthia zâwk chu tirhkoh sawm leh pakhat zingah chuan chhiar tel a ni ta a. He dihmun luah tur hian tu emaw zâwk zâwk pawh an awm thei ve ve a; an mizia leh an nun en chuan vuivai hmêl a awm lo
vang tih pawh a chiang sa reng a ni. Josefa Barsaba JUSTA chu thlan loh zawk a lo ni ta a. Nimahsela, he dihmun pawh hi ropui tak a ni sa tawh a ni.

TBC Justa Zaimuana, pu TBC Lalramkima’n Pathian thu aṭang a dawnna a sawiah chuan, “Zirtir sawm leh pakhat zingah JUSTA ang hian dinhmun ropui tak leh hruaitu dinhmun luah tura thlan ni lo mah ila, Pathianah vui mai lova lawm taka awm zel tur kan ni a. Pathian remruat ang zel zâwk hi kan innghahna tur chu a ni,” tiin a sawi a. Nakinah Pathian remruat ang zelin zuitu rinawm kan nihna zawk chu Pathianin min hriatsak reng ang a, khawngaihnaa kan chanvo chu a bo dawn chuang lo a ni.

‘JUSTA’ tih hrim hrim hi Tirhkohte 18:7-ah leh Kolossa 4:11-ah kan hmu bawk a. Tirhkohte 18:7-a kan hmuh, Paula thlen inpa a ni a. Pathian be ṭhin a ni a; a in pawh inkhawmna in nen a inzawm a ni. Pathian tirhkoh leh kohhrante tana mi ṭangkai tak a ni bawk. Kolossa-a kan hmuh pawh Isua hming ang pu ve ringtu ṭha tak, JUSTA ti a koh duatna hming a ni.

Naute hmingah hian Bible hming hi kan hmang uar hle a, chuti ang chuan tuna kan han tar lan tawi tê aṭang hian TBC Justa Zaimuana pu TBC Lalramkima hian Pathian Thu ngun taka a zir aṭangin a Bible hming tur hi a lo thlang a ni tih kan hre thei ta a ni.

Ziaktu : Pro Pastor David Lalkhawngaiha
📸 : Patrick Dawnglura