Mizo Elite News hi ṭha i tihzawng a nih chuan min lo Follow dawn nia

Taliban Ten Hmeichhe Raipuar Mek A Chhungte Hmuhah An Kaphlum

Taliban te chuan lalna leh thuneihna an chelh hnu ah thil tam tak thleng sawi tur a awm chho ta mek zel. Taliban militants ten hmeichhe naupai lai mek chu a chhungte hma ah an tihlum tih hriat a ni.

He hmeichhia hi Banu Negar a ni a, policewoman niin local prison ah hna a thawk. Inrinni khan an chenna in Firozkoh, central Ghor province ah Taliban militants ten an va luhchilh.

Silai keng mi 3 ten a pasal leh a fate an phuar bet a, chumi hnu ah an hmuh lai rengin Banu Negar hi an kaphlum ta a ni. Tihhlum a nih hian Banu Negar hi naute thla 8 a upa a pai lai mek a ni bawk.

Terror group te erawh in BBC hnenah he thihna ah hian an inhnamhnawih lo tiin an kut an sil. Spokesman Zabiullah Mujaheed pawh in thil thlen dan kimchang leh chiang tak an chhui zui mek thu a sawi ve bawk.

Mujaheed hian Taliban te thil tih ngei a ni tih a la hriat loh a, mimal inhmelmakna emaw thil dang vang pawh a nih theih thu a sawi. Thlalak thehdarh ah Banu Negar te in ah hian bangah thisen a kai nual hlawm. Rorelna leh ram awpna thar ah hian Afghanistan ah tharum thawhna nasa tak a thleng tih chu sawi ngai lova hriat sa a ni.