Mizo Elite News hi ṭha i tihzawng a nih chuan min lo Follow dawn nia

Taliban te thuneihna hnuaia awm duhlo a thlawhna a an ram chhuahsan tum Afghan rawlthar a thi

Taliban nunrawng ten an ram an awp beh sak vangin Afghan mipui te mangang takin an rum mek a, mi eng emaw zat ten an ram an chhuahsan dan tur an dap nasa hlawm hle.

Kar liam ta mai a Taliban in Afghanistan an awp beh khan Kabul Airport ah mipui tam takin an ram chhuahsan an tum a, thlawhna ah an in ek beng. Thlawhna zim hut hut karah ah khan Afghan footballer rawlthar Zaki Anwari chu Taliban te thuhnuaia awm ai chuan tiin an ram chhuahsan mai zawk a thlang a ni.

Amaherawhchu Zaki Anwari hian a duhthusam ang muanna a hmu thei lo. An ram chhuahsan a nun tha zawk neih a tum laiin USAF Boeing C-17 atang hian a tla a, a nunna a chan.

Zaki Anwari hi kum 19 lek chauh a la nia, national youth team ah a khel thin a ni. A boralna lungchhiatthlak tak hi Afghan news agency Ariana chuan Ningani khan an puangzar a, General Directorate for Sport te pawn Amwari thih thu hi an nemnghet.

Mi sang chuang ten an ram chhuahsan duhtu zingah khan Anwari hi a tel ve. Taliban te kutah chuan ralmuanga an nun theih a ring lo. Kabul Airport a US Air Force thlawkchhuak tur ah thlawhna thla leh ke ah te an bei fur a, an tum ram an thlen hma in thlawhna atang lei lam ah a then an tla thla lai video te pawh hmuh tur a awm.

Tarlan dan chuan US military thlawhna a mihring tla thla lai video a pakhat zawk kha Zaki Anwari hi a ni tih an sawi a ni. Kabul Airport a thil thleng hi a la reh zui mai lo. Video thar pakhat atang Afghan hmeichhia te chuan US Sipai te hnen ah an dinhmun atang chhanchhuak a tanpui hram turin mittui nen an lo ngen lawm lawm hlawm bawk