China a Police te chuan mipa pakhat Xie Lei tih chu a suitcase chhungah thil rimchhe zet lo chhuak an hriatchhuah hnu ah an man thu hriat a ni.
South China Morning Post in a report danin Xie Lei hi Suitcase lian tha tak nen tlanbo tum in a in ruahman a, a chuanna tur Taxi Driver pawh in a Suitcase ken chu a lo hlan pui bawk tih an sawi.
Xie Lei chetdan chu rinhlelawm a awm vangin Police te chu koh an ni. An sawidan in Suitcase chhung atang hian eng emaw thil rimchhe tak a lo chhuak tih an sawi.
Police te an thlen hnu ah Suitcase chhunga thil awm chu eng thil nge a nih chiah tih finfiah tura an han hawn chuan mihring ruang tawih lam tawh a lo awm a ni. Suitcase a mitthi ruang an hmuh hi hmeichhe kum 19 a nih thu hriat a ni bawk.
Xie Lei hi bar manager hna a thawk thin a, China’s central Shaanxi province a khawsa a ni. Ruang an hmuh hmeichhia nen August thla hma lam khan local bar ah hna an thawk dun tawh.
Southeastern China a Taihe County, Jiangxi Province a Police te chuan Case hi chhuichian hna an thawh mek thu an sawi a, Xie hian he hmeichhe hi engvanga a nunna laksak nge a ni tih leh a phen a thil inthup te hrechhuak turin theihtawp an chhuah tih an puang.
Nunna chan ta hmeichhia hringtu pa in Oriental News Today hnen ah a fanu chu an fa upa ber a ni a, migrant worker in hun eng emaw chen a awm tawh bakah thah a nih hma lawk pawh in an la inbiak pawh thu a sawi.