Mizo Elite News hi ṭha i tihzawng a nih chuan min lo Follow dawn nia

Singapore Nu Pakhat Chuan A Awmpui Maid Chu Nasa Taka A Tih Hrehawm Hnuah A Thih Tir

Maid a inhlawh fa thin tam tak te hian an awmpui te atang hrehawmna leh tih duhdahna nasa tak an tawk thin a, thenkhat te chuan an nunna hial an chan phah reng bawk.

Singapore a nu pakhat Gaiyathiri Murugayan, 40 chuan a awmpui hmeichhia Myanmar mi Piang Ngaih Don chu natna leh hrehawm tinreng a tawrh tir hnu ah a thih tir tih hriat a ni a, Thawhlehni (Feb 23) khan a ruaitu nu Gaiyathiri hi thubuai awrhtir in, 28 charges an siam sak.

Piang Ngaih Don hian Singapore ah Gaiyathiri te awmpuia thawk tur hian May 2015 khan a kal a, an retheih em vangin a fapa kum 3 mi enkawlna tura inhlawh fa a ni nghe nghe.

Hna a thawhna ah hian Gaiyathiri nen inremna an siam a, an inremna ah chuan phone leh chawlh neih phal loh a nih bakah maid dang thian te nen a inkawm ang pawh phal loh a ni. Piang pawh hian inremna chu a pawm thlap.

Mahsela hna a thawh tan hnu rei lo ah a awmna nu Gaiyathiri hian lungawilohna a zawng tan a, Piang chu a ti duhdah hle. Che muang lutuk,thianghlimlo leh thil ei hnem lutuk angin selna tur chhuan lam a siam a ni.October 2015 atang chuan kutthlak in hrehawm tinreng in a nghaisa chho.

Piang hi chaw pawh a pe tha duh lova, a pek chhun pawh chhang tlemte chauh a ni. Fridge a mi chaw dai vek tawh te a ei thin bakah darkar 5 chhung chiah mutna hun a siam sak a, ei tur mumal a hmuh loh vangin hna a thawh chhungin 15kg lai a hloh hman a, thla 14 chhungin a taksa rihna 38 per cent zet a tlahniam.

Inbual leh inthiar pawhin kawng khar an remti lo a, Privacy engmah pek a nilo. Gaiyathiri hian bal lutuk tiin a hmel hmuh a peih loh vangin face mask thahnem tak a vuah tir bawk.

Piang hian nitin mai kutthlak a tawk thin a,a taksa ah pawh pem leh duk a awm nual. Hmunphiah leh thir fian te pawh a hmang thin tih hriat a ni.

Piang hian sawisakna leh tih duhdahna tinreng a tawrh te hi a taksa in tlin lovin July 26, 2016 khan a boral. A thih hian a taksa rihna hi 24kg chauh a ni hial hman a ni.

A tirah Gayathiri chuan Piang chunga an thil tih zawng zawng ah hian a pha a, amaherawh chu autopsy a a landan chuan Piang hian a taksa hmun 37 zetah ser thar lam a nei a, pawn lam ah hliam hmun 47 ah a nei bawk. A taksa atang ei tur a hmu tha lo hle a ni tih chiang tak in a hmuh theih bawk. Gaiyathiri hian thil thleng zawng zawng an chian hnu ah a Maid chunga a thil tih ah hian a in puang. An awmpui rapthlak taka tihhlum na ah hian Gaiyathiri leh a chhungte dang he thil a inhnamhnawih te chu an phu tawk theuh hremna pek an ni ang.