Mizo Elite News hi ṭha i tihzawng a nih chuan min lo Follow dawn nia

Sazu Tûr Hmanga Ha A Nawh Vangin A Nunna Chan Phah

India ram Mumbai a Dharavi a mi tleirawl hmeichhia kum 18 chuan tihpalh thil thu in Sazu tûr hmanga a ha a lo nawh vangin a nunna a chan tih hriat a ni. Pathianni liam ta mai a thil thleng kha a ni a. He hmeichhia hi Apsana Khan tia koh a ni.

Mumbai Police te sawidan in September 3 zing dar 10 vel ah Apsana Khan hi a tho chu a ha nawt turin a inpuahchah a, toothpaste a hmang emaw a tih laiin Sazu tur (rat poison cream) chu a toothbrush ah chuan tat in a ha alo nawt.

A tirah chuan a hre lawk lo a, mahse a hnu deuh ah toothpaste a hman thin rim nen a in ang lo lutuk chu an en chian chuan toothpaste alo ni reng reng lo. Sazu tûr zawk a lo hmang. Rang takin a chhak a, mahse sazu tûr hian a hnathawh tur ang a thawk vek tawh.

A nu leh pa te bulah chuan an hauh a hlauh vangin engmah a sawi duh lo a, a taksa nuam lova a damloh nat zual zel vang chuan a nu chuan a fanu chu a ringhlel ta a,a fanu chu thil awmzia zawtfiah in Apsana Khan chuan tihpalh vanga Rat Poison cream hmanga a ha a nawh thu hi a sawi ta a ni.

Damdawi in hnai ber Sion hospital ah hruai a ni a, hospital 3 laia sawn a nih hnu ah pawh a dinhmun in that lam a pan thei lo. JJ hospital ah admit leh a ni a September 12 khan a boral tih an puang. Doctor te pawn tûr vanga boral ngei a ni tih hi an nemnghet a,forensic test nei turin sample hi thawn a ni bawk.