Mizo Elite News hi ṭha i tihzawng a nih chuan min lo Follow dawn nia

Saka, Rashford Leh Sancho Ten Penalty An Hlah Hnuah Fans Atang Diriamna Nasa Tak An Tawk

Pathianni zan a Wembley Stadium a Euro 2020 Final khelh zawh tak ah Italy leh England te inhmachhawn in Champion nih an inchuh a, inkhelh pangngai ah inhneh tawk mahse penalty shoot-out hmangin Italy ten hnehna an chang a ni.

England lam atang a penalty hlah tu pathum Bukayo Saka, Marcus Rashford leh Jadon Sancho te chu Fans ten nasa tak a diriam in thu dengkhawng tak tak hmangin an bei zui tih hriat a ni bawk.

Fans te chuan vun rawng zawnga inhmuhsitna te an tilang a, hmuh hrehawm khawp thu kha tak tak an chhakchhuak a, kum 19 lek a upa Saka phei chu Penalty hnuhnung ber a hlah hnu khan a Social Media post thar ber Comment ah Nigeria a kir tur leh an ram England chhuahsan vang vang turin an ti hial a ni.

Zawngte leh banana emojis te an hmang uar viau. Player te tawngkam ngeiawm leh huatthlala a beihna nasa tak awm ah hian FA chuan an dem tak zet. England’s Football Association chuan statement an chhuah nghal a, Italy laka penalty shootout hmanga an chaklohna ah an Player ten online racist abuse an tawk chu an en liam loh tur thu leh Racists fans an mamawh bik lo tih an sawi ve hmak.

Metropolitan Police te chuan Player te Online lama na taka diriam tu te lakah hian hma lak a ni dawn a, Investigation neih a nih tur thu an puang a ni. London Mayor Sadiq Khan chuan social media companies te hnen ah tawngkam mawilo tak tak hi an platform atang thianfai turin a hriat tir nghe nghe.