Mizo Elite News hi ṭha i tihzawng a nih chuan min lo Follow dawn nia

Odisha Thingtlang Pa Ve Mai Chuan YouTube A Bultan Nan Smartphone Leina Tur Loan A Puka Tunah Zet Chuan Mi Hlawhtling Tak A Ni Tawh

Ni sa hnuai kher lo atang pawh hian pawisa hi a lakluh theih a, mahsela hlawhtling tak tak ni tur erawh in taihmak leh teirei peih a ngai hle thung.

Social Media hmanga sum hmuh hi tunah zet zawng thil thar a ni hran tawh lo. YouTube phei chu a hmang thiam tan sum huiluhna kawng tha tak a ni. Odisha’s Sambalpur district a Babupali khua a cheng thingtlang pa ve mai chuan YouTube kaltlangin hlawhtlinna a chang.

Hepa hi Isak Munda a ni a, bul atan dawn hian sum leh pai pawh a nei hran em em lo. Video siamna turin Phone leh hmanraw dang pawh a nei lo a,a thianpa Cellphone kaltlanga Video a en atang amah ah phurna leh tihve chakna a siam sak a ni.

Munda hi nitin kawla nichhuak chhiar a inhlawhfa ve thin tho a ni a, mahsela hrileng Covid vangin engmah ti thei lovin an awm. An chhungkaw dinhmun a harsa si a, eizawnna tha leh rintlak kawng dapin YouTube luhchilh chu a thlang ve ta rawih a ni.

YouTube Video a siamna tur Smartphone a neih miau loh vangin Rs 3000 chu bul tan nan Loan a puk ta a, March 2020 khan a Video hmasa ber thil a ei lai chu a dahchhuak. A video hmasa ber phei hi chu eng teh ual a ni hran lo a, purunsen leh green chilli nena pakhala a ei lai mai mai chu a post a ni.

Mahsela miten an en duh in Viewer alo ngah phian a, chu chuan a hma aia tha zawka hmalam pan tumna a pe. “Smartphone ka neih ve hmasak berna turin video siam nan Rs 3,000 ka puk a,ka video hmasa ber kha mi nuai 4.99 aia tam thlirtu an awm. Retheihna kar a kan nun hman dan leh thil eidan vel te chu tarlangin mitam takin an lo ngaina viau a ni tur a ni, thlirtu rinphak bak a tam an awm a, tunah chuan income tha tak ka neih phah ta” tiin Munda hian news agency te a hrilh.

Isak hian Youtube hi a hlawhpui tawh hle a, an chhungkaw khawsak dan hrang hrang te tarlangin Nuai chuang zet sum a hui lut hem hem tawh. A channel hian nuai 7.6 aia tam subscribers a nei tawh a, video 300 chuang en turin a dahchhuak. A nupui pawh in a pasal kawng zawhah chuan a thlawp thiam a, a hma ang in sum leh pai ah pawh harsatna lian tham em em an tawk tawh bik lo tih a sawi a ni.