Mizo Elite News hi ṭha i tihzawng a nih chuan min lo Follow dawn nia

Northern India Ah Christian Pastor Chu Vuakhlum A Ni

Khawvel hmun thenkhat ah Christian te hian tih duhdah leh nghaisakna nasa tak an tawrh thin thu hi hriat a ni fo. India ram ngei ah pawh a thleng a ni.

Morning Star News in a tarlan dan in India ram Haryana state ah Christian Pastor chu kar liam ta mai June 30 khan Sangoi village, Karnal District a mi Hindu sakhaw vuantu chuan a vawhlum tih hriat a ni.

Pastor Vinod Kumar hian online worship a neih zawh hnu ah a nunna laksak tu pa Kashyap unaupa chuan an khua ah damlo tlawh turin Phone hmangin a hrilh a, Pastor Kumar hian ngenna a dawn chu ti hlawhtlingin khua ah chuan a kal. Mahsela Kashyap hian Pastor Kumar let tur chu lo beiin a lu ah vawi tam na takin a vua.

A nupui Sunita Kumar chuan a pasal Vinod hi Kashyap hian hnung lam atang a inrinloh laiin a bei thut a, Bike atang a tlak hnuah na takin a lu ah a vua a ni tiin Morning Star News hnenah a hrilh.

Khaw miten thil thleng an hriat rualin Kashyap hi Police te lo thlen hma in an man a, an khawih nual hman. Police ten mipui lak atang hian hruaiin Custody ah an hreng. Pastor Kumar hi damdawiin hnai berah hruai ni mahse a nunna an chhan hman lo.

Sunita chuan a pasal thattu Kashyap hi an chenna in ah a pasal tawngtai tir turin a kal fo a, a chunga rawng taka a che thei mai hi a hrethiam lo hle tih a sawi. Tualchhung christian hruaitu te chuan Pastor Kumar hi Christian a nih vanga thah ngei niin an ring nghet hmiah a ni. Pastor Kumar hian a nupui leh a fanu kum 11 a upa te a kalsan.