Mizo Elite News hi ṭha i tihzawng a nih chuan min lo Follow dawn nia

North Korea Mi Chu ‘Squid Game’ An Ramah A Tawlh Ruk Vangin Thi Tura A Chungthu Rel A Ni

North Korean mipa pakhat chu Netflix Series hit ‘Squid Game’ chu an ram ah a lalut tih hriatchhuah a nih hnuah man a ni a, thi tura a chungthu rel sak a nih thu tarlan a ni.

North Korea thuneitu ten an man tak hi a hming tarlan a nilo a, zirlai a la ni. China atang USB flash drive hmangin ‘Squid Game’ hi an ram ah a la lut tih an sawi a, a zirlai leh thian dang te hnen ah a copy hi hralhchhuak in Classroom ah zirlai ten an en tih North Korean authorities ten thu an dawng.

Radio Free Asia in a tarlan danin an ram phal loh thil a lakluh vang hian tihhlum tura thu pek chhuah a ni a, silai hmangin an kaphlum dawn. Drive lei tu zinga pakhat chu life sentence pek a ni a, Show en ve tu midang 6 te pawh kum 5 chhung hna hram leh rim thawk tura hrem an ni bawk ang.

‘Squid Game’ lakluh avang hian zirtirtu bakah school administrators lam te thleng pawh in an tuar tel phah thei dawn a, an hna atang chawlh tir leh hnathawk a chhawr an tawk thei tih tarlan a ni bawk. Tun a zirlai te laka thubuai hi North Korean government in “Elimination of Reactionary Thought and Culture” dan a bawhzui hmasak ber hiala tarlan a ni.

December 2020 a Law an pass thar ah mi tu pawh heng media lam film leh music te ram dang atang a dan lo anga laklut emaw thehdarh te hi hrem theihna pekchhuak a ni a, a bikin US leh South Korea lam chhuak ngat phei chu an khirh hle. Thi tur hial a an chungthu rel sak theihna a ni bawk. Netflix hi China ah chuan hman theih a nilo a, mahse Pirate site lamah en tur a awm thung.