Mizo Elite News hi ṭha i tihzawng a nih chuan min lo Follow dawn nia

Kylie Jenner in Travis Scott nen an fa pahnihna tur a pai mek tih a nemnghet

Entertainment khawvel a mite hriat hlawh em em mai leh fans pawh ngah tak mai Keeping Up with the Kardashians star leh Makeup Mogul, Kylie Jenner (kum 24) chuan Thawhlehni liam ta khan Travis Scott nena an fa pahnihna tur a pai leh mek tih a nemnghet.

Instagram kaltlang in amah zuitu maktaduai chuang hma ah Kylie hian video second 90 a rei a post a, a naupai thu hi a puangzar a, baby bump pawh langsar ang reng takin a tilang. A fanu neihchhun Stormi in a dul a fawp lai te chu a larzui hle.

Kylie Cosmetics founder rai thu hi chawlhkar 2 liam tawh ah khan khawthlang Media ten an chhuah tawh. Kylie Jenner hi a mimal nun thup thiam tak a ni a tuna a fanu Stormi a pai lai pawh hian engmah thuchhuah hranpa a siam lo. Stormi pian hnu ah chauh fa a nei tih hriatchhuah a ni. Tin, an chhungkua Kardashian te pawh in an chhungkaw privacy hi an humhim hneh hle bawk.

Stormi hi February 2018 khan a piang a, tunah kum 3 ni ve tawh in a nu Kylie in a duat uchuak thin zia te pawh hmuh theih a ni. Kylie leh Travis te inkar hi Media te tan pawh hriatthiam harsa tak a ni a, a changin “ni leh nilo” ang rengin an khawsa ve deuh reng. Inthen thu an puan hnu ah hmuh dun fo an ni thin a, October 2019 a rawn herchhuah leh meuh chuan an inkawp tha leh ta tih an puang.