Mizo Elite News hi ṭha i tihzawng a nih chuan min lo Follow dawn nia

Hranghlui Zaithiam Zira Hnamte Zofaten Kan Chan Ta

November 10th, 2020 : Tukin zing dar 5:40AM khan Zira Hnamte chu a mu kaih thawh zawh loh niin chatuan ram min lo pansan ta.

Pu Zira Hnamte hi MZI dintu te zinga mi leh vawiin thleng a MZI hmangaihtu niin Aizawl Bungkawn tlang veng a cheng a ni.

A chanchin :

Zira Hnamte tia kan lo hriat làr tak hi Hrangkaia Hnamte leh Pi Chalchani Chhakchhuak te fapa a ni a. A hming tak chu Zirkunga a ni a, a lo puitlin hnuah Zira Hnamte tiin kan lo hre lar ta a ni.

April ni 23, 1951 khan Darzo khuaah a piang a. Lehkha thiam thei tak a ni a, lehkha a zir lai pawhin a thiam ber pawl a ni chho deuh reng țhin.

Zai lama a làr mai bakah hla phuah lamah a inhmang hle bawk.

May ni 30, 1977 khan K. Rothangpuii nen an innei a, chumi hnu lam ațang chuan a chhangchhe ta deuh nge, hla pawh a phuah thar lutuk ta lo niin a lang.

Zai thiam a ni a, ama sak tur hla pawh a phuah chhuak thiam hle țhin. Kum 1979 Beat Contest-ah khan mahni hla phuah ngei sa thiam ber lawmman *Buizova Trophy*-ah Tape Recorder a dawng a. Zaithiam lawmman pathumnaah Radio-ah a dawng bawk. Kum 1980 Mizorama Beat Contest ah khan Mizo mipa zaithiam ber lawmman pakhatna atan Radio a dawng leh a ni.

A hla phuahte pawh a tunlai hlawm hle a, amaherawhchu belhchian a dăwl ang reng hle. Kum 1975 April thla ațangin All India Radio, Shillong-ah hla a khung țan a. A tirah hla pakua a khung a, a khung belh zel a, Aizawl lamah pawh radio nen hian an inkungkaih chho ta zel a, hla pawh a thun belh zel bawk.

Zira Hnamte leh a hlate tih lehkhabu R.L. Thanga Chawngthu in kum 1988 khan a tihchhuahsak a, chutah chuan hla tam tak a unau leh țhiante hla a chuang.

Kum 1974 Mizo Țhalfavang Kut (Shillong)-a ama hla ngei- Khiangawi Nuthai tih sain 2nd Prize a dawng a. Chuta țang chuan AIR Shillong-ah koh a hlawh nghal a, chutah chuan hla 9 lai a thun hman a ni. A hla record zinga hriat larzual țhenkhatte chu:
1. Romei
2. Lenrual an kim ta lo
3. Țhiante u tih te a ni.

Radio (AIR) ah hla 150 ațanga 200 inkar vel a thun tawh a, lawmman eng emaw zat a dawng tawh bawk. Audio Album a siam tawh dan chu-
1. Lunglen – 1981, Otto Production
2. Ka lo hre ta – 1983, Aizawl Radio House Production
3. Rohlu ber Krista – 1984, Self Production
4. Zan duhawm (Krismas) – 1984, Self Production
5. Ka taksa leh ka nunna – 1987, [Self Production]
6. I pianna ramah kir leh rawh – 1990, Self Production
7. Nau chhiatna ram – 1997, Self Production
8. Sudden Muanga – 2001 (Hla lenglawng lam)

Pathian hla a sakte pawh hi a lar hlawm viau a, chung zingah chuan ‘I pianna ramah kir leh rawh’ (ama phuah) tih hla phei hi chu Radio-a hla thlan hun luah tam ber pawl a ni țhin.

An chhungkuain Bungkawn Tlang Vengah an cheng a, tukin 10.11.2020 kan ama chenna inah kaihthawh zawh loh a ni a, damdawiina hruai niin a boral tih puan a ni ta a ni.

Source : David Z Hmar (MSR)