Mizo Elite News hi ṭha i tihzawng a nih chuan min lo Follow dawn nia

Foster Care A A Unaute Nen Ṭhen Hran Lo Tawk Tawhin Fahrah Unau 5 Te Chu A Chunga Thleng Ang An Tawn Ve Loh Nan An Vaiin Fa Ah Ala

Fahrah hringnun hrehawmzia chu a tawng tawh a piangin an hre chiang ang. Hmangaih em em unau te nen a inṭhen hran ngat phei chu thihna khawp hial in a na ngei ang.

Cincinnati, Ohio a awm Robert Carter (kum 29) hi kum eng emaw chen liam ta ah khan foster care ah awm ṭhin in, a hmangaih a unaute nen hreh tak chungin an lo inṭhen hrang tawh. Kum 12 a nih laiin Foster Care ah hian a awm. Unau 9 niin a unau 8 te nen lakhran an ni.

Hrehawm ti tak leh lungleng chungin a ṭhanglian chho a, tunah chuan Salon neitu a ni ta hial. An unau chunga thleng ang chiah kha unau dangte pawn an lo tawk ve mek a.

December 2018 khan mipa naupang pathum te chu fa atan a lo la tawh. Heng naupang a lak te hian unau hmeichhia pahnih an nei. Robert Carter hian unau inṭhen nat zia a hrechiang hle a, an unau hmeichhe 2 te hi zawnchhuah sak ngei a tum tlat.

A hnu ah an unau hmeichhia enkawltu nu chu a be thei ta a, inhmuhna hun siam puiin mipa naupang 3 leh hmeichhe naupang 2 te an han inhmu leh thei chu an lawmin an hlim nasa hle a, an mittui hial tla in an inthlah hleithei tawh lo.

Robert hian amah ngeiin alo tawn tawh a nih vangin a enliam thei lova, heng naupang 5 te hi inṭhen leh ngai tawh lo turin an vaiin fa atan a la ta a ni.

“Hei hi ka hrechiang a ni, an vai hian lak (adopt) ngei ka duh. A chhan chu kei pawh foster care aṭanga seilian ve tho ka ni” tiin a sawi.

“Unau inhmangaih leh inthlahlel tak te ṭhen hran hi a nat zia kei hian ka hrechiang hle bawk a,an chunga thleng ve tur atan ka duh lo” a ti bawk.

Robert chuan miten a thil tih ah hian an ngaihtuah zia a sawichhuak bawk a, atan an vaia enkawl a harsat lutuk palh an ring. Mahse Robert chuan an ngaih ai in a awlsam zawk thu leh a fate 5 chu naupang fel tak an nih thu a sawi.

October 30 khan unau 5 te hi fa ah dan ang takin a la. Heng a fate 5 hi an hming Marionna 10, Robert Junior 9, Makayla, 8, Giovanni 5 leh Kiontae, 4 te an ni.

Chenna in thar lei turin an inbuatsaih mek a, chhawmdawl leh ṭanpuina tur in GoFundMe Page siam in $39,000 aia tam sum an hmu tawh bawk.

DM