Mizo Elite News hi ṭha i tihzawng a nih chuan min lo Follow dawn nia

Covid19 Positive Te Tan Inhlan Tawp In An Ei Tur An Buatsaih Sak

Mizoram ah kangmei vanga kan buai lai mek in India ram khawpui Delhi leh a chheh vel ah te chuan hrileng nasa lutuk vangin an buai mup mup thung a ni.

New Delhi hi tun dinhmun ah chuan India rama hri hluarna leh a bu pui ber an ni rih a, Positive tam lutuk vangin damdawiin ah in enkawlna pawh an daih tawh lo.

Hrikai eng emaw zat te chu tlawh pawh theih loh in an chenna in ah te an inkharkhung a, ei leh in lak kawng ah buaina an tawk nual a, chhuah a hlauhawm vangin chaw ei tur pawh an inbuatsaih tha thei lo.

Hun thim leh mangang taka an awm kar ah hian samari mitha tak tak an lo awm zel a, Covid positive te harsatna hriatthiam puiin Delhi a The Delhi Sikh Gurudwara Management Committee (DSGMC) te chuan hrikai te chaw ei tur buaipuiin an tan an lo in pe deuh tawp mai.

DSGMC te hian chaw an siam te hi Covid19 vei, mahni a eirawng pawh bawl theilo te hnen ah an pe. Chaw an pek dawn hian PPE leh thuamhnaw him tak inbel in an kawngkhar bul ah an dahsak thin.

Mamawhtu te tana biak mai theih turin helpline number an dah a, call an hmuhna a piang ah ei tur pe in home-delivery services hi an nei. DSGMC president Manjinder Singh Sirsa chuan “Covid19 kai chhungkua te, mahni a eirawng inbawl thei lo te tan an chaw ei tur kan buatsaih sak a, a petu te hian chaw an pek hian PPE kits leh thuam him tak an inbel thin” tiin a sawi.

DSGMC hian Covid19 positive mai bakah hian pandemic lai a chhungkaw harsa zual chawm ngai leh migrant labourers te pawh an lo tanpui thin a ni.