Mizo Elite News hi ṭha i tihzawng a nih chuan min lo Follow dawn nia

Coronavirus (COVID-19) Vangin Infiamna Khawvel Boruak Tibuai

Khawvel hmun hrang hrangah coronavirus a darh mek zel a, nasa takin nunphung a tibuai a, infiamna khawvel pawh a nghawng buai hle. Infiamna kal tluang lai chi hrang hrang chu tuna hri leng mek vang hian a buai a, eng emaw zat chu an chawlh phah hial tawh a. Tun hnaia infiamna an chhunzawm tak loh thenkhat han tar lang ila.

Infiamna tihtawp te:

British football inelna chu April 3 thlengin chawlhtir vek an ni. UEFA chuan kar leha Champions League leh Europa League khelh turte chu a hun an sawn hla.

France ram leh Germany rama league sang te chu an chawl lailawk a. Anni hmaah hian Netherlands, Portugal, Spain leh USA ah te pawh league hi an lo chawl tawh bawk a ni.

London Marathon chu April 26 a neih tura ruahman niin, kumin October 4 a neih turin a hun hi an sawn hla a. Manchester Marathon leh Brighton Marathon te pawh an thulh lailawk bawk.

Rugby union lamah vawiina Wales leh Scotland te’n Six Nations match an khelh tur pawh a hun sawn niin, Pathiannia Sale leh Harlequins te Premiership Cup final khelh tur pawh a hun an sawn bawk a ni.

 

England leh Sri Lanka te Test cricket series khelh pawh an titawp a ni. Golf huangah Masters chu a hun an sawn a, hemi hma deuh hian Players Championship pawh chhunzawm lo tura tih a ni.

May thlaa Hungary rama Giro d’Italia cycling neih tur chu thulh a ni. Formula 1 chuan April 5 a Vietnam Grand Prix neih tur chu thulh a nih tur thu an puang.

Formula E chu thla hnih chhung an chawl dawn a, Paris, Seoul leh Jakarta intlansiakte chu a nghawng buai dawn a ni.

Infiamna chawl rih lo:

Rugby league kal mekah Catalans vs Leeds Rhinos te chu an inkhel ang. Vawiin leh Thawhtannia Netball Superleague fixture te chu khelh a ni ang. Pathianniah hian Glasgow khawpuiah basketball inelna BBL leh WBBL Trophy finals chu an khel ang.

National League football chu a tam zawk an khel hlawm ang. March 14 atanga March 24 thleng London khawpuia Copper Box Arena ah Olympic boxing qualifying chu neih a ni ang. All England Open Badminton inelna chu neih a ni ang.

Engtin nge ni zel dawn?

Grand National chu April 4 atang khian neih tan tho tur a ni dawn a. Europe khawmualpuia football lama thuneitu sang UEFA chuan Thawhlehniah hian meeting an nei dawn a, Euro 2020 chu kum khatin an sawn hla mai thei.

Nilaithawhtanah khian Premier League club te chuan meeting pawimawh tak an nei dawn a, hetah hian UEFA in Euro 2020 chungchanga thutlukna an siam chu an ngaihtuah ang a, Premier League season kal mek a nghawng theih dan tur an ngaihtuah ang.

Mi rilrua lian em em mai chu Tokyo 2020 Olympic Games a ni a, neih theih a nih dawn leh dawn loh chu mi ngaihven a tling a. Japan rama Olympics minister chuan July 24 a neih tan tura ruahman chu coronavirus vanga a buai pha dawn a nih chuan kum thar lama sawn mai pawh a ngai thut thei niin a sawi.