Mizo Elite News hi ṭha i tihzawng a nih chuan min lo Follow dawn nia

Brazil a khualzin te tlawh nasat thin Furnas Lake a lung chim ah lawnga chuang mi 10 ten nunna an chan

January 8 khan Capitolio, Minas Gerais state, Brazil ah chuan dil pakhat Furnas Lake ah chhiatna a thleng a, tourist te tlawh nasat em em ah kham pang lung sang tak tak in tiang chho ut chu chim/tawlhin thihna a thlen phah.

Dil a lung a chim lai video clip hi Internet ah phochhuah a ni. Reuters in he thil thleng ah hian a tlem berah mi 7 thi ang in a puang a, mahse a hnu deuh ah nunna chan hi mi 10 lai an ni tih an puang leh.

Mi 32 laiin hliam an tuar bawk a, a then an lu ah hliam in dinhmun ngaihtuahawm tak pawh an awm tih hriat ani. Video ah hian lung rawn chim lai hian a hmun tlawh a kal mipui te chu mangang in an rak chel chul bawk.

Rescue teams te dive squad leh Brazilian Navy member te chu chhiatna thlenna Furnas Lake an pan nghal a, chhanchhuah leh bo zawn hna an thawk.

Furnas Lake hi lung bang sang tak takin a hual vel a, a hmun hian khualzin te a hip thin hle. Capitolio official tarlan danin weeknd hian 5,000 vel tlawh tu an nei tlangpui a, holiday ah chuan 30,000 te tlawhtu an nei thin thung.

Eng vanga lung hi rawn chim thut nge a nih tih hi zawhna lian tak ani a. Tarlan danin he lai hmun region hi chawlhkar 2 liam ta khan ruah nasa tak surin tuilian hial a thlen a, mi tam tak chenna in chhuahsan a ngaih phah. Ruahtui thahnem tak a dawn vang in lung hi nghet tawk lovin sawinghing in a awm phah nia hriat ani.