Mizo Elite News hi ṭha i tihzawng a nih chuan min lo Follow dawn nia

Apartment Building A Kangmei Chhuak Ah Mi 150 Nunna Hlauhthawnawm Taka Ding Chu Ui In A Chhanhim Vek

Ui te hi mihring te tan hian an lo tangkai zia leh rinawmna a langchiang hle mai. Chhungkaw chenna Apartment Building pakhat a kangmei chhuak ah mi tam tak nunna hlauhthawnawm taka ding mek chu ui pakhat in an nunna a chhanhim vek.

November 17 khan Bengaluru a Vasundhara Layout of Sampige Nagar, Electronic City a mi VMAKS Chalet apartment ah kangmei hi chhuak a ni. Apartment a kan lai hian a neitu ber Vijay Pillai awm loh lai tak a ni a, a nu kum 60 a upa leh a ui enkawl Appu te an awm. A nu hi khum ah a mu hahchawl a, ngaihtha taka a mut lai hian an ui chuan thil eng emaw tak a hmu tih hriat theih tur in a bauh ta vak vak mai a ni.

Chutia ring leh nasa em em a a bauh vak vak takah chuan in a nu chuan a va enfiah ta ngat a, mei alh hluah chu a va hmu chawpchilh ve nghal a ni. An ui Appu in thawm chhuah a a bauh vak vak chhan chu kangmei chhuah thu hrilh a lo tum lek vang a ni reng mai.

Kangmei chhuak a hmuh rual chuan Apartment a khawsa ve an thenawm dang te chu a hrilh hre nghal thuai thuai a, emergency authority te koh an nih hnu ah Apartment ah hian kalin kangmei thelh mih nan hian darkar 2 zet hun an hmang nghe nghe a ni.

Kangmei chhuah chhan hi engchiah nge tih hriat nilo mahse gas cylinder ah engmah thil felhlel a awm loh vang in Current kalsual palh vanga thleng a nih an rin ber thu Electronic City Fire Safety Department a thawk Senior Officer, Nagesh chuan a sawi.

He ui fing tak Appu hian a hun taka thil thleng hriattir a an nunna a chhan sak vangin Apartment a cheng te pawh in an lawmzia hahip in an sawi a. Tumah hliam leh nunna chan an awm hman lo bawk. Building ah hian chenna in 50 a awm a, mi 150 vel an khawsa mek a ni. A hun takah Appu hian lo hriattir hman lo se chuan mei alh hian Building hi a tuam chhuah hman an ring bawk.