Mizo Elite News hi ṭha i tihzawng a nih chuan min lo Follow dawn nia

Amah Hmangaihtu Lak Atang Acid Beih Tawka A Khawhmuhna Chantu Hmeichhia Chuan Civil Services Exam Hmachhawn A Tum

He hmeichhe huaisen leh tumruh zet Kajal Prajapati hian amah hmangaih em em tu sawmna a dawn a hnawl vangin acid a beih a tawk. He thil thlenna hi kum 6 liam tawh khan a ni. Mahsela a chunga thil thleng chu Kajal Prajapati hian amah tichhel tu atan a hmang a, IAS officer nih tum in theihtawp in a bei mek ani.

Acid a beih a tawh vang hian a mit khawhmuhna in a tawrh phah hial a, a mit lehlam in khaw eng a hmuh leh theih nan operations 27 zet a hmachhawn a ngaih phah ani.

“Lehkha zir rih ka duh vangin a sawmna ka lo hnawl sak a, hei vang hian ka nun chu min tihchhiatsak ani” tiin Kajal Prajapati hian a sawi.

February 14, 2016 khan a damchhunga a theihnghilh tawh ngai reng reng loh tur ser chu hnuchhiah sak a ni a,Mehsana, Gujarat a an college hnaih lawkah engineering student pakhat Hardik Prajapati chuan bike a a lampan in acid hian a thehzui a. A hmai, awm leh a ban te chu a kangchhia. Hetih lai hian Kajal hi first-year commerce student ani bawk.

“Ka hmai chu tihchhiat in a awm a, ka mit ka meng thei tawh lo. Min admit na damdawiin a doctor te ngei pawhin ka mit hian khaw eng a hmuh leh theih min beiseipui tawh lo hrim hrim” tiin a sawi.

Acid hmanga beitu pa hi an chi pui a ni a, college ah nitin zuiin Valentine’s Day ah te pangpar a pe a, a hmangaih thu a hrilh chuan Kajal chuan chutiang ngaihtuah hman a nih loh thu leh college ah hian lehkha zir tura kal a nih thu in a lo chhang. Kajal chhan na hian Hardik chu nasa takin a ti thinur.

Hetiang khawpa harsatna leh ser rapthlak hnuchhiah sak a nih hnu ah pawh a zirna chu bansan mai ala tum lo. A pa hnen ah a zirna chhunzawm leh a duh tih hrilhin a pa pawh chuan a fanu thutlukna chu a remtih pui.

“IAS officer nih ngei ka duh a, a chhan chu ka hmeichhiatpui te ka venhim theih nan leh ka tawrh ang kha an tawrh ve lohna turin ani” tiin a sawi ani.

Kajal pa hi rickshaw driver niin kum naupang te a nih lai atang police officer nih chu a chak em em thin a ni. A in enkawlna atan hian Rs 15 lakh lai an chhungkua hian an seng tawh a,an chhungkaw thil te hial hralhin government atang Rs 3 lakh chauh chhawmdawlna an dawng.

Acid a beitu Hardik chu Court in a chungthu a rel sak a. Mahsela Kajal hian a natna tawrh zawng zawng te kha engtik ah mah a theihnghilh tawh dawn lo. Tunah erawh hma lam panin a tum tihlawhtling ngei turin ke a pen mek ani.