Mizo Elite News hi ṭha i tihzawng a nih chuan min lo Follow dawn nia

Afghanistan ram buai laia Kabul a nausen bo kha hmuh a ni ta

2021 August thla a Afghanistan ram in buaina na nem lo hmachhawn a Taliban hel pawl in ram an awpbeh khan Afghan mipui te chuan nun nuam zawk an hmuh theihna turin an inthiar chhuak nasa hlawm ani.

Kha buaina chhuaka nausen bo zinga tang Sohail Ahmadi chu a bo atang thla 4 hnu ah a chhungte nen an inzawng hmu ve leh thei dawn ta a, Sohail Ahmadi hi August 19 khan sipai te hnen ah Taliban awpna atang tlanchhiat tum mipui tam tak karah chuan hlanchhawn a ni a, mahse chin hriat lohin a awmzui daih.

Reuters lam in November thla ah nausen Sohail Ahmadi bo chungchang leh a thlalak hi an rawn chhuah a, hemi hnu ah Kabul a taxi driver pakhat Hamid Safi (kum 29) chuan alo enkawl tih an hre zui ta ani.

A bo lai hian Sohail hi thla 2 chauh a upa ala ni nghe nghe. Hamid Safi chuan Airport ah Sohail hi amah chauha a awm a hmu a, a chhungte chanchin hria a a hmuh mai loh vangin an in ah hruai haw in a enkawl zui tih a sawi.

Sohail chhungte dik takin an zawn hmuh hnu pawh hian Safi hian a pe let phal lawk lo a. Chawlhkar 7 indawrna neiin Taliban police ten Safi hi an hreng hial bawk. Mahse an inkar hi chinfel a ni ta a nih hmel a, naute hi a pu bul ah an hlan tawh. Safi hian mittui tla chungin a fapa anga alo enkawl Sohail hi a pu hnenah a pe.

Sohail hi a nu leh pa dik tak Mirza Ali Ahmadi leh Suraya te nen erawh hmaichhan ah an la inhmu thei lo. Nikum khan Mirza Ali Ahmadi chhungkua hi United States a thiarchhuah zingah khan an tel ve. He naute hi a nu leh pa te kianga cheng turin US lama hruai tura ruahman ani.