Mizo Elite News hi ṭha i tihzawng a nih chuan min lo Follow dawn nia

Academy atang in Will Smith a in resign

Pathianni kal ta a Oscar semna stage ah comedian Chris Rock kut a thlak vangin demna nasa tak a awm hnu in Will Smith chuan Academy atangin a in ban (resign) thu a puang.

‘King Richard’ actor hian vantlang hma a tharum thawh zawng a a chetchhuahna ah hian a thiam loh ani tih a in pawm a. “94th Academy Awards a ka chetdan kha ngaihdam theih chi loh a ni” a ti. He a thil tih vang hian Academy of Motion Picture Arts and Sciences a membership a nih na atang in banna siam in a hnuleh a a sawhkhawh thleng tur pawh tuar turin a inhuam tih a sawi bawk.

Will Smith chuan Chris leh a chhungte bakah Award semna a kal khawm leh khawvel puma In lama lo thlir tu te hnen ah a natna a thlen sak vangin pawi a ti hle a, Academy in a chunga rinna an nghah a ti thlawn a, an hnathawh that lawm tura kalkhawm nominees leh winners te lakah a inthiamlo hle tih a tarlang bawk.

Academy in Will Smith banna chungchang ah hian chhanna pe nghal in an pawm thu an puang a, ‘disciplinary proceedings’ chu chhunzawm a nih tur thu Academy president, David Rubin chuan a sawi. Academy hian tharum thawhna lam chi reng reng chu an ngawihbo pui dawn lo tih an sawi tawh a. Board meeting hi April 18 ah neih leh tur ani.

Will Smith hian ceremony ah Chris Rock a’n a nupui Jada Pinkett-Smith lukawlh chungchang chu fiamthu thawhnan a hman vangin a lungawilo a, a nupui Jada Pinkett-Smith hian sam tlakkawlhna ‘alopecia’ an tih natna a vei ani. Award semna ah hian Will Smith hnen ah lemchan thiam ber nihna ‘Best Actor’ chawimawina hlan ani nghe nghe.