Mizo Elite News hi ṭha i tihzawng a nih chuan min lo Follow dawn nia

A tet laia hralh tu a nu leh pa te chu zawngchhuakin an thlahthlam vangin a khing dawn

Chinese rawlthar pakhat chuan a tet laia midang hnena hralh tu a nu leh pa te chu a chunga an thil tih tenawm tak vangin khin let a tum tih hriat ani.

Liu Xuezhou hi Hebei province, northern China a mi niin college student a ni a, kum 17 chauh a upa ani. Kum 2005 ah a nu leh pa dik tak te chuan child traffickers hnenah an hralh. A hnu ah mi dang ten fa ah an la a, mahse fa a la tu te hian accident tawka an boral vangin a vawi 2 nan Liu Xuezhou hi fahrah dinhmun ah bawk a kir leh.

A nu leh pa dik tak te chu Online kaltlang in a zawngchhuak a, hmaichhan ngei ah an in hmu bawk. Liu hian a sawidanin a nu leh pa ten an inneih hma in an nei a, an hralhna man hi a pa in a nu chhungte hnen ah thuamchhawm man atan a pe.

Rei tak hnu a a hring tu a nu leh pa te a zawn hmuh leh meuh chuan an lo inthen fel tawh a, nupui/pasal dang an lo nei ve ve tawh bawk. Kum tam tak hnua an inzawn hmuh leh pawh chuan an inkar chu a tih that phah chuang lo niin a sawi a. Vawi 2 nan a nu leh pa te chuan an thlahthlam leh tak thu sawiin, hei vang hian fapa rilru na in a nu leh pa te chu khin a duh ta ani.

Liu Xuezhou chuan a nu leh pa te hian chhungkua an din ve ve tawh vangin an bula awm turin engmah sawmna a hmu lo a, chenna tur pawh a neih loh thu a sawi. A chunga a nu leh pa te chet dan chu hriatthiam har a ti hle a, an rila rah an fapa ngei a nihna ah a chenna leh khawsak ve na tur leisak turin a ngiat a, a nih loh chuan a chenna luah man tum sak turin a phut ani.

A nu leh pa te erawh an in sawithiam a, an fapa hian an tlin loh leh lei phak loh a phut tiin an sawi ve thung. A pa Ding chuan a fapa Liu chu college a chhuah hma an bula awm turin a sawm a, a graduates hnua awmna tur lam ngaihtuahsak te pawh an rilruk tih local media te a hrilh, mahse media hma a a nu leh pa te thusawi chu Liu hian dawt vek a nih thu a sawi.

Liu hian a sawi zel danin a nu chuan biak pawh theih loh in Social Media WeChat ah a block thu a puang bawk. Vantlang leh midang atang nawrna a nat vang chauh in a nu leh pa te nen khan hmaichhan ah an inhmu a, a tet laia an nunrawn ang tho in a nu leh pa te hian eng atan mah an tilo tih a sawi ani.