Thil thleng mak pui pui hi hriat tur a awm ve leh nawlh thin. southeastern Europe lamah Kosovo ah chuan mipa pakhat a hming tarlan loh chu damdawiin ah a pum na lutuk tuar zo lovin a pan rawih.
He pa hi kum 33 mi Pristina, Kosovo a cheng a ni. Hospital a pan hian Doctor chuan chuti khawpa a pum ti na tu chu eng nge ni tih hre turin X-Ray an neih sak ta a ni.
A pum ti na tu ber an han hmu chiah chu a thawng in rin a harsa zawk khawp mai. Kum 33 mi pum chhungah hian cellphone Nokia 3310 chu alo awm reng mai a ni. Engtin nge Phone hi a dawlh dan kimchang tak hriat a ni lo a, han pai tawih theih chi reng reng a ni lo tawp.
Darkar hnih chhung zet Operation neih a nih hnu ah a pum a awm Phone hi an phawrhchhuak thei. Operation buaipui tu Skender Teljaku chuan Facebook ah thil thleng hi a rawn puang a, a pum chhung ah hian phone battery acid hi lo leak palh se chuan a nunna atan a hlauhawm theih hle thu a sawi.
2014 atang Mobile Phone dawlh palh hi alo thleng fo tawh thin. 2016 pawh khan kum 29 upa mipa pakhat chuan a Phone dawlhin Surgery neih a ngaih phah hial a ni.