Mizo Elite News hi ṭha i tihzawng a nih chuan min lo Follow dawn nia

A Nupui Leh A Fanu Te Hnenah Chuan A Hawn Leh Ngei Tur Thu Tiam Mahse In Lam A Kir Leh Dan Zet Chuan A Nupui Fanau Te Mittui A Ti Tlak Sak Ta Si

Myanmar sipai nunrawng vangin chhungkaw in hmangaih tak tak te chungah thihna in thla a zar zel a, nimin lam khan kum 25 a upa North Dagon, Yangon a mi Chit Min Thu hi kahhlum leh a ni.

Chit Min Thu hian Myanmar sipai sawrkar duh lohna kawng zawh ah hian a kal ve fo a, a ram in zalenna a hmuh leh theih nan theihtawp in a bei. A nupui nau pai mek leh a fanu te a kalsan.

Vanduaina tawh hma a tarlan dan in Chit Min Thu hi In atanga a chhuah dawnin a nupui chuan “vawiin i chhuak leh a nih chuan ka pum chhunga i fa hi ka hrin sak lo ang che” tiin a nawrh khum thu an sawi.

Mahse, a ni chuan “kan chhungkaw tan chauh pawh ni lovin, kan ram tan a lawm min hrethiam hram rawh” tiin a thlem lungawi thei hram a. A pawimawh takin tiin a nu hnenah 1,000 a dil a, a nu chuan vanneihna atan tiin lime (သံပုရာ) pumkhat a ipteah a thun sak bawk.

A fanu kum hniha upa chu pawmin a chalah an kiss zeuh va, “ka lo hawng leh dawn nia aw” tiin a chhuah san ta a. A thutiam angin a rawn hawng leh ngei mai, mahse nungdamin a ni tawh si lo, a hmangaih a ram tan a nun a hlan ta.

Silai mu pakhatin mi pakhat nunna a lak theih rualin a chhung leh kua unau thenrualte hnenah pawh lungngaihna leh tahna a thlen tir tih a kaptu SIPAI hian a ngaihtuah lo em ni?