Mizo Elite News hi ṭha i tihzawng a nih chuan min lo Follow dawn nia

A Nupui Raipuar Lai Chu Thuamchhawm Vanga A Thah Hnuah A Taksa Chandarh In A Phum

India ram hi zawng hmeichhia te nun hi a ralmuang lo thin teh zawng a ni. Hmeichhe pawngsual chungchang ah lah nise pawngsual thlen tamna ber ram zinga mi kan ni bawk.

Bihar a Nalanda district a thingtlang khaw pakhat Nonia Bigha village ah chuan pasal in a nupui nau pai mek chu thuamchhawm vang in rapthlak takin a nunna a laksak a, a taksa a chandarh hnu ah a phum tih hriat a ni.

He tualthahna hi Hilsa police station area chhunga thleng a ni. A nupui that tu a puh Sanjit hian a nupui Kajal chhungte lak atang hian thuamchhawm dang a phut belh leh tih an sawi a, mahse an thil phut pek an nih loh vangin rawng takin a tihlum.

Sanjit leh Kajal te hi nikum June 27 khan an innei. Hetih lai hian Sanjit hi Indian Railways ah a thawk. Sanjit chhungte hian thuamchhawm atan Kajal te hnen atang Rs 4 lakh an phut. Kajal hringtu pa Arvind Singh chuan a fanu mo na chhungte hnen ah hian kum in February khan Rs 80,000 an pe tawh tih an sawi. Mahse duham in chin tawk an nei lova, a ai tam zawk an phut leh tih a sawi.

Arvind chuan Sanjit chhung ten an chenna in atang Kajal chu a bo angin an hrilh a,mahse Arvind hian a fanu Phone number pawh biakpawh theiha a awm loh vangin a ngaih a tha lo. Police te hnen ah an fanu chinchang ngaihven pui turin a ngen ta tawp a ni.

Investigation an neih hnu ah Nonia Bigha a field a phum tawh ruang pakhat chu an hmuchhuak a, a taksa chu a lo in chan sawm nuai tih an sawi. Ruang an hmuhchhuah hi Kajal ruang ngei a ni tih finfiah a ni tawh bawk. Arvind Singh chuan a fanu rawng taka thattu a pasal leh a chhungte 4 lakah Case siam in thubuai awrh tir nghal an ni.