Mizo Elite News hi ṭha i tihzawng a nih chuan min lo Follow dawn nia

A Bialpa Sam Asghari Nen An Inhual Hnu Lawkah Britney In Instagram A Chawlhsan

Pop icon Britney Spears chuan hun rei tak a lo kawp tawh Sam Asghari nen an inhual thu a puanzar atanga reilo ah a Instagram deactivate in a chawlh thu a rawn puang nghal.

Britney Spears hian Instagram hi chawlhsan hlen erawh a tum lo tih Twitter ah a rawn sawi a, inhualna lawmna pah ni fawma chawl zawk a ni. “Lo lungngai lutuk suh inhual na neih lawm nan hun reilo te chhung chawlh ka duh. Ka rawn kir leh thuai ang” tiin a sawi.

Britney Spears hi kan hriat theuh angin a chungah Conservatorship dan lek kawh a ni. A bialpa Sam nen hian an inzuina pawh a rei ve thawkhat tawh a. 2016 a Britney music video “Slumber Party” atang an intawng.

Inhual leh inneih duh viau thin mahse Britney nun hi phuar beh tlata a awm vangin a theih loh. He dan hnuai ah hian Britney hian pasal leh fa a neih phal sak a nilo.

Kum 13 zet he dan hi Britney chungah zam a lo ni tawh a, tunhnai ah zalenna a hmuh theih nan Britney leh a pa Jamie Spears te chu Court ah an inkhing. Thu thar berah Jamie Spears hian a fanu Britney laka Conservatorship dan chu hlih remti in Los Angeles court ah petition a file.

Britney Spears hi pasal lama tluang lo ve tak a ni tih chu sawi leh chuan a ngai lo. 2004 khan Jason Alexander nen inneiin thla tlemte hnu ah an inthen leh nghal. Hemi kum vek hian dancer Kevin Federline nen inneiin fa 2 an nei hman a, 2007 ah an inthen a ni.